الاسم: إسراء إبراهيم
السن: 20
المحافظة: الشرقية
الموهبة: الكتابة والقراءة
بدأتِ امتى؟ 10 شهور
اكتشفتِها ازي؟ أنا بحب القراءة وكان عندي جزء بسيط في الكلية إننا نكمل قصة بحسب أفكار كل واحد وأنا وجدت إن عندي أفكار كويسة وأحداث وخيال وسرد كويس وبكتب كويس ولما صحابي قرأوا اللي كتبته شجعوني إني أنمي الموهبة دي
نوع الكتابة: اسكربتات وقصص وروايات
مين دعمكِ؟ صحابي وأختي
إنجازاتك: معظم رواياتي نزلت على مواقع إلكترونية منهم:
«فوزية القوية
الأخ القاسي
أريده شبهي
بهية والبلطجي
أغرب صدفة
صعيدية وأفتخر
حكايتي في الثانوي
روح الفؤاد»
بقيت معروفة من بعض الناس اللي متابعة أي حاجة بنزلها والحمد لله ده بفضل الله وبقيت اجتماعية أكثر
رواية روح الفؤاد مازالت قيد الكتابة
جزء من كتاباتك: «من رواية روح الفؤاد»
قاعدين في الصالون وهو بدأ كلام
احم طبعا أنتي عارفة إني جاي أطلب إيدك حابة تسألي على إيه
هى: أنا أصلا مش موافقة
هو بزعل: ليه
هى ببرود: أنت في عقلك أنت المفروض تروح تتقدم لواحدة في مستواك لأني مهقبلش بيك لأن مستواك اوطى مني
هو بصدمة من كلامها: أنتي بتقولي إيه
هى: في إني مش هقبل بواحد بشهادة دبلوم وأنا تعليم عالي
تيجي إزاي دي أنا واحدة تعبت في مذاكرتي وأهلي صرفوا عليا كتير وبعد ده كله اتجوز أي حد ولا إيه
أنا مش أقل من صحباتي اللي مخطوبة لدكتور واللي متجوزة مهندس ولا دكتور برضوا
وانا هتكسف أقول ليهم إني مخطوبة لواحد معه دبلوم
هما هيكونوا بيتفاخروا بيهم قدامي وأنا هكون قاعدة بسمع كلامهم ومقدرش اتكلم زيهم ولا هقدر أرفع عيني ليهم
هو: قصدك تتفشخري بمستوى التعليمي لخطيبك ولا جوزك
هى مردتش عليه وكملت: أنا صحبتي متجوزة مهندس زيها
أنا عايزة واحد من مستوايا يكون كمان مهندس زيي مش أي كلية أقل مني كمان
وأنت بقى يا أبو دبلوم هقبل بيك
فؤاد: أنتي اتجننتي إزاي تكلميني بالطريقة دي يا روح لولا إنك بنت خالتي كنت اتصرفت معك تصرف تاني
أنتي أصلا طلعتي واحدة تفكيرك محدود وجا*هلة وتفكيرك عقيم يا روح أنتي زي ميكون متعلمتيش
هو إيه مستوى تعليم واطي وعالي ده اختراع جديد بتفكري إزاي فين الثقافة أنتي كده بتتساوي زي اللي متعلمش خالص
الجواز مكنش بالتعليم والشكل والمظاهر إنما بالاحترام
والاهتمام والحب والثقة والتفاهم وإن واحد يكون قادر يصرف عليك وطلباتك تكون مجابة
مش كل اللي واخدين كليات كويسين وطريقة تعاملهم حلو
ممكن ميعرفش إيه المودة والرحمة كل همه شغله وزعيق
طول اليوم ويركنك عالرف ساعتها هتكوني مبسوطة يعني
ومش كل اللي واخدين دبلوم وحشين ممكن تلاقي معه الحنية والاهتمام وكل طلباتك عندك ومش هيحسسك بالنقص وبيكون لبق في الكلام
أنا مبقولش كده عشان أنا معايا شهادة دبلوم أنا أصلا بفتخر بنفسي طالما بصرف على نفسي وعلى أمي وأختي
ومش مخليهم عايزين حاجة ومستوايا المادي كويس
بس للأسف بسبب كلامك وتفكيرك ده أنا اللي بقولك مش عايزك زوجة ليا ولا أم لاولادي لأن أكيد هتعلميهم
يفكروا كده وأنا مش عايز كده وكمان كرامتي متسمحليش إني أخد واحدة هانتني وهى مبتفكرش أصلا
أنا مستغرب إزاي أصلا أنتي مهندسة معندكيش مرونة خالص في الكلام دا أنتي كمان مش عايزة واحد في أي كلية
عايزة واحد مهندس بذات عينه بجد ده في كمية التخ*لف
عالعموم ربنا يسعدك يا بنت خالتي مع الشخص اللي تختاريه واعتبريني اخوكي
أنا أصلا مكنتش عايز اتقدملك لأن أنتي مش في بالي خالص
أنا معجب بواحدة محترمة وكلها حنية ومن مستوايا وهعرف اتكلم معها ببساطة وهى طريقة كلامها لطيفة مش متعجرفة
يلا سلام يا باشمهندسة
ده كله وروح مش مستوعبة إزاي قال ليها الكلام ده كله وكمان مكنش مديها فرصة ترد عليه
أخد فؤاد أمه ومشي وهى عمالة تسأله مالك ولكن مبيردش عليها
وصلوا البيت وكان مضايق جدا ودخل اوضته وقعد عالسرير وحط وشه ما بين ايده
وبيكلم نفسه: ليه هديتي أحلامي اللي بنيتها معك يا روح دا
أنا حبيتك وكنت دايما بدعيلك إنك تكوني حاجة كويسة
وناجحة وكنت فخور بيكي بس بعد كلامك معايا حطمتيني
حرام عليكي أنا انصدمت من طريقة تفكيرك يا روح مش
هى دي روح اللي كنت بهزر وأضحك معها وهى كانت بتهزر معايا وبتتكلم معايا باحترام ولطافة
كلامك ده وجعني جدا يعني أنتي عارفة الظروف اللي خلتني
أختصر الطريق وأدخل ثانوي يعني اسيب أهلي محدش
يصرف عليهم واروح أتعلم رغم إني دخلت دبلوم صنايع
وجبت مجموع عالي كنت هدخل منه كلية هندسة بس
اشتغلت أكتر وبنيت نفسي لو كنت أعرف إنك بتفكري كده
كنت دخلت كلية بعد الدبلوم وعملت معادلة بس قولت
أشتغل أكتر من شغلانة عشان أشتري شقة كبيرة ولما نتجوز
نسكن فيها ولكن كسرتيني بكلامك يا روح وفجاة نزل ايده
وقرر خطوة هياخدها وهينفذها عشان نفسه أولا وبسبب نظرة المجتمع إنه بيحب المظاهر والشكليات
وفجأة جه اتصال له ورد ولكن اتخض وقال جاي
الكتب الي اشتركتي فيها: لسه مش اشتركت في أي كتاب لكن في أقرب فرصة هشترك إن شاء الله
اشتغلتي ليدر او مؤسسة قبل كده و في كيان ايه؟ لا مشتغلتش
الكيانات الي كنتي فيها: مدخلتش في أي كيان لكن بنشر على جروبات عالفيس وعلى جروبي
نفسك توصلي لأي في مجالك: إني أكون ناجحة بجد ومعروفة واكتسب محبة أكتر من الناس وأي رسالة بوصلها من كتاباتي يعملوا بيها
تعرضتِ لحاجة احبطتك قبل كدَ في مجالك: لأ
رسالة تحبي تقوليها لغيرك: كون نفسك بنفسك وكن مميز عن الآخرين واسعى دائما للنجاح وافتخر بنفسك ولا تعتمد على أحد سوى الله توكل عليه لتكون شخصية كويسة ومحبوبة ولها مكانتها ولا تيأس أبدا لأن الله معنا وكن عندك ثقة وخض التجربة ولا تضيع أي فرصة من يديك
ايه اول اعمالك وهل فخوره بيها وبطريقتها ولا لا سواء كان سرد أو حوار او حبكه: قصة واقعية
وفخورة بكل حاجة فيها
استفادتي ايه من تجربتك: إني أثق في نفسي واتعلمت من أخطائي اللي حصلت بداية ما كتبت
اكتر عيوب فيك ك كاتب ونفسك تغيرها: أحيانا بيحصلي فتور ولكن بالدعم من اللي حواليا والناس اللي متابعاني كله بيزول بفضل الله واللي حواليا
السؤال الأخير ايه تقييمك لنفسك: مش هقول 10 من 10 لأني لسه في بداية المشوار ولكن كويس بتقدير جيد جدا
لأن لسه موصلتش لمرحلة الإحتراف
ليست هناك تعليقات:
إرسال تعليق