حوار صحفي مع أميرة سامي

 الاسم: أميرة سامي " وتين.."

السن: 19 سنة 

المحافظة: الجيزة

الموهبة: كتابة خواطر شعر وإلقاء

بدأتِ امتى؟ بدأت كتابة من سنتين لكن بدأت انشر كتاباتي من 5 شهور 

اكتشفتِها ازي؟ عن طريق أحد اصدقائي 

نوع الكتابة:شعر وخواطر وارتجالات

مين دعمكِ؟ اختي وصحابي كلهم

إنجازاتك:شاركت في ثلاثة كتب وأحد الحفلات في مركز الربع الثقافي 

جزء من كتاباتك:أشد الألم حزن لا تستطيع الإفصاح عن أسبابه، وتكتفي بقول أشعر بالضيق ولا أعلم السبب، وأنتَ تعلم يقينًا ما سبب هذا الحزن ولكنه لا يحكي. 

عذرًا ثم عذرًا أيتها الحياة سأعيش حياتي لنفسي، يأستُ مِن كثرة ما تألمتُ بسبب الجميع، ولا أحد يشعر، يأستُ لتعبي مِن أجلهم وهم لا يَشعرون 

سأستمر وسأدفن مَشاعري بعيدًا عن قلبي. 

لن انتظر أحدًا يُشعرني بقيمة نفسي فأنا أعلم جيدًا

كفىٰ كفىٰ عتاب لأشخاص لا يهتمون بشيء.

لا تتعب نفسكَ في التعبير، لا أحد يَشعر بِما تشعر به.

أميرة سامي

الكتب الي اشتركتي فيها:لحظة إبداع/ اليورانيوم/ ثنايا أحرف

اشتغلتي ليدر او مؤسسة قبل كده و في كيان ايه؟ نعم / كيان خطوة حلم وكيان زهرة اللاڤندر/ دعم الكاتب الصاعد

الكيانات الي كنتي فيها: اليورانيوم - إبداع اقلام- خطوة حلم - كيان دعم الكاتب الصاعد/كيان روح

 

نفسك توصلي لأي في مجالك:يكون ليا ديوان خاص بيا واوصل بحاجة بكتاباتي اكون فخورة بنفسي شخصياً وكتاباتي توصل قلوب الناس 

تعرضتِ لحاجة احبطتك قبل كدَ في مجالك: نعم

رسالة تحبي تقوليها لغيرك: للوصل إلي الحلم لا داعي من الالتفات الي الخلف ولا الاصغاء الي كلام البعض وعدم اليأس

ايه اول اعمالك وهل فخوره بيها وبطريقتها ولا لا سواء كان سرد أو حوار او حبكه:  اول اعمالي قصيدة لوالدي فخورة بيها جداً

استفادتي ايه من تجربتك: اتعلمت كتير وازاي أطور من كتاباتي ويكون ليا علاقات بناس اكتر وأن الكتابة افضل الوسائل للتعبير عن كل ما يدور بداخلنا 

اكتر عيوب فيك ك كاتب ونفسك تغيرها: كان في الاول كنت بتأثر بأي كلمة محبطة  واني لما بزعل أو اكتئب بيأثر علي كتاباتي وبوقف وقت كبير 

السؤال الأخير ايه تقييمك لنفسك: انا لسة ف البداية ولسة مش المفروض اني انا اللي اقول حاجة زي دي لأني مهما وصلت واتعلمت حاجات جديدة مش هقدر اقيم نفسي

حوار صحفي مع سندس محمد

 الاسم: سندس محمد"عـابـره.."

السن: 17

المحافظة: مصر / القاهره

الموهبة: الكتابة

بدأتِ امتى؟ من سنه تحديداً 

اكتشفتِها ازي؟ هو أنا من زمان أوي وبحب الكتابه جداً وبتشد للفصحىٰ أكتر كنت بَدَوّن أى شعر أو خواطر أو نصوص بالفصحىٰ ،لحد بقا ما كبرت ودخلت مجال الكتابه وقولت لي أنا مكتبش وابدأ أطور من نفسي وأنمي الموهبه دي بس كدا .

نوع الكتابة: خواطر ونصوص وأرتجالات وأسكريبتات

مين دعمكِ؟ أختي، وصحابى كلهم.

إنجازاتك: شاركت في العديد من الكتب الالكترونيه والمسابقات.

جزء من كتاباتك:هُناك بعض من البشر تتخذ من الكتابة ملجأ وإحتواء لها تظهر حُزنها بكلمات مبعثرة عمَ يدور بها،والبعض الأخر يأخذها كمعبر لتوضيح سعادتهم بشكل مبهج وجميل كهوآية يمارسونها عندما يبدون بمزاج جيد،والأغلب يستخدمها عندما يُريد أن يسرد ما حدث له من آلام محفورة بداخله ولن تخفف إلا بالإفصاح عنها والتى يخُطها علي ورقات دفتره أو بمعنى أفصح صديقة،نعم هناك أُناس إتخذو الكتابة صديقة لهم يشكون لها ويستنتجون بأنها تُداويهم وتمسح دمعاتهم وهذا شيء جيد لأن الكتابة "لا تـخـون" وهذا هو المضمون من الصداقة الحقيقية، فمن تُمثل له الكتابة شيئًا مما سبق فأنت قد فزت حقًا، هنيئًا لك بصديق حقيقى في هذه الحياة المزيفة.

الكتب الي اشتركتي فيها: خواطرنا ، كتاب افتكرني لسه منزلش ،و حوريه الجنه.

اشتغلتي ليدر او مؤسسة قبل كده و في كيان ايه؟  لا

الكيانات الي كنتي فيها:عائله حياه،كيان مزيج ،كيان حلم بسيط، كيان حوريات الجنه،كيان ليل، كيان ألماس.

نفسك توصلي لأي في مجالك: أوصل لحاجه أفتخر بيها الأول في ديني من حيث الكتابات الدينيه ثم أُريد أن أستطيع من خلال كلماتي ملامسه قلوب كل القرأ ،تأليف كتاب ،أن أكون صاحبًا بكتاباتي لمن لا صاحب له .

تعرضتِ لحاجة احبطتك قبل كدَ في مجالك: لا الحمد لله 

رسالة تحبي تقوليها لغيرك: أنه مييأسش أبدآ بشوف ناس كتير بيقولوا أحنا معندناش مواهب أحنا ملناش لازمه في الوجود أحنا أتخلقنا كده وكميه أحباط رهيبه ،أنا كنت زيكو كده لحد من  سنه تحديداً، سنه بس شقلبت حياتي من أنسانه بلا هدف إلي أنسانه بتسعىٰ عشان تحقق مرآدها وتطور من مواهبها، وأخيراً دور علي نفسك جواك.

ايه اول اعمالك وهل فخوره بيها وبطريقتها ولا لا سواء كان سرد أو حوار او حبكه:  عندما نتظاهر بالقوةِ، وعدم اللامبالاة وتجنب ما يحزنا، فعندها حقًا نكون قد ضاقت بنا الأرض زرعًا، وتشتت بنا السُبل، ولا نملك سوىٰ أن نظهر عكس ما نشعر به، فلا تسأل قوي الظاهر ماذا به، فما في باطنه سوىٰ عُميانا.

"ناس كتير معرفهاش دخلت قالتلي النص حلو جدا ده غير صحابي وأهلي فأنا فخوره بحاجه زي كده وأنها عجبت ناس كتير "

استفادتي ايه من تجربتك:

 أستفدت حاجات كتير وأهمها أن الكتابة وسيلة رائعة لتفسير ما يدور بداخلنا وأنها عالم لا نهائي من الكلمات والأُسس والقواعد .

اكتر عيوب فيك ك كاتب ونفسك تغيرها: أني بدرس في ثانوي وكمان لما بزعل أو أتخنق مبعرفش أكتب أو أفكر في أي حاجه ،والدراسه تعتبر عائق ليا حالياً

السؤال الأخير ايه تقييمك لنفسك: هيا الحاجه دي مش أنا اللي المفروض أقولها علشان مهما وصلت في الكتابة من دراسه وتأسيس وقواعد وتعلم ف ده يعتبر نقطه في بحر الكتابة شيء لا نهائي من المعلومات والدراسه ليس لها حد،ولكن أجتهد الآن في تطوير كتاباتي والله المستعان.

حوار صحفي مع دعاء حسن

 الاسم: دعاء حسن | وردة أمل |

السن: 13

المحافظة: الاسكندرية

الموهبة: الكتابة

بدأتِ امتى؟ بكتب من صغري مع اختلاف نوع الكتابة، وأنا صغيرة كنت بكتب أغاني، كنت بعرف أجيب كلمات موزونة وقافية وأنسقهم بشكل أغنية، وحاليًا بكتب خواطر وقريبًا قصص وروايات هتنزل باسمي بإذن الله.

اكتشفتِها ازي؟ زي ما قولت فوق بكتب من وأنا صغيرة، بس جت فترة وقفت كتابة، وبعديها كتبت نص في يوم وعرضته على أهلي ونال إعجابهم، فده شجعني أني أبدأ أكتب، كمان كان في جروب خواطر جميل جدًا، حبيت كتاباته، فبدأت أكتب أنا كمان، وانضميت لكيانات كتير لنشر كتاباتي وتنمية موهبتي واستفدت كتير الحمد لله.

نوع الكتابة: خواطر، روايات

مين دعمكِ؟ أهلي وأصحابي. 

إنجازاتك: أنا شايفة الكتابة لوحدها إنجاز، إنك تعبر عن شخصية في رواية، أو عن أحاسيسك ومشاعرك، إنك تنصح الناس، وتشرح شعور ناس كتير معرفتش تعبر عنه.

ومع ذلك من ناحية أخرى فإنجزاتي: _المشاركة في كتابين ورقيين للخواطر المجمعة: مشاعر متناقضة، أحرف ناطقة ونشر الأول في معرض الكتاب لهذه السنة.

جزء من كتاباتك: 

*زهور الحب*

 الحب كالزهرة التي تزهر في القلب، إذا سقيتها بماء الاهتمام، والرعاية، ولم تنسي السؤال، كبرت، ونمت وأزهرت، وتفتحت أزهارها، وإذا أهملتها ذبلت وذبل معها هذا الحب يا صديقي.

فأحسنوا الحب يا أحبابي؛ فليست كل الأزهار تحملها كبير.

*#دعاء_حسن | وردة أمل |*

الكتب الي اشتركتي فيها: مشاعر متناقضة، أحرف ناطقة.

اشتغلتي ليدر او مؤسسة قبل كده و في كيان ايه؟ اه، مؤسسة آثار أقلامنا: لتعليم الديزاين، ومسابقات ارتجالية وأفضل الكتب لقراءتها.

الكيانات الي كنتي فيها: اوركيديا، عائلة بنت الأزهر، دماس الليل، مزيج، طوفان، مشاعر كالنجوم، جريدة الفكر العربي والعديد من الكيانات.

نفسك توصلي لأي في مجالك: إفادة الناس وجعلهم يحبون القراءة، نشر العديد من الكتب الورقية الروائية، والكتب الهادفة، وأكون كاتبة يقتدى بها في مجال الكتابة.

تعرضتِ لحاجة احبطتك قبل كدَ في مجالك: اه، بس محدش هيقدر يخليني أيأس لأن اللي عنده طموح كبير وحلم مش هييأس، حتى لو حد حاول يحبطه، خلي دايمًا طموحك عالي وافتكر ساعتها أد اي حلمك ده غالي عليك، وشوف بقا شوية الكلام دول هيوقفوك ولا هيخلوك تجري أسرع في طريق نجاحك وتحسن من نفسك وتطور مهاراتك، القرار قرارك أنت، وأنت اللي هتحدد ده.

رسالة تحبي تقوليها لغيرك: خلي عندك حلم وطموح كبير، وأسعى لتحقيق حلمك في طريق سليم، وأوعى تيأس من كلام الناس أو تخليهم يحبطوك، الكلام السلبي زي المعركة، خليك أنت فايز فيها وأبعد عنك الطاقة السلبية، ومتوزعش طاقة سلبية على اللي حواليك، بالعكس خليك دايمًا الشخص المتفائل والإيجابي، اللي الناس متندمش أبدًا على صحبته، اتمسك بحلمك وانشر عبارات التحفيز وامسك ورقة وقلم واكتب بخط كبير، حلمك اللي نفسك تحققه وتوصل ليه، وكل ما تحس بشوية إحباط بص ليه، وللعبارات الإيجابية حواليك، افتكر جهدك وتعبك وابعد عنك الإحباط، وتفائل دايمًا بالخير.

ايه اول اعمالك وهل فخوره بيها وبطريقتها ولا لا سواء كان سرد أو حوار او حبكه: أول أعمالي عمل نصائحي، اه الحمد لله.

استفادتي ايه من تجربتك: استفدت كتير جدًا، واتعلمت حاجات كتير، طورت مهاراتي في الكتابة، واكتسبت صديق جميل، فكما قيل: خير صديقٍ قلم وخير جليسٍ كتاب.

اكتر عيوب فيك ك كاتب ونفسك تغيرها: الكتابة على الهاتف حيث أني عادةً ما أكتب عليه، وأود أن أكتب أكثر على الورق.

السؤال الأخير ايه تقييمك لنفسك: مهما بلغنا من أحلام فنحن ننطلع إلى طموحات أكبر. 

لهذا لازال الطريق طويلًا وأرى بأنني أحرزت تقدمًا جيدًا في طريقي بفضل الله.

حوار صحفي مع منة الله ياسر

 الاسم: منة الله ياسر مغربي"رنوة"

السن: ١٦

المحافظة: اسكندرية 

الموهبة: كاتبة وبتعلم شِعر

بدأتِ امتى؟ من سنة وشهرين

اكتشفتِها ازي؟ من وأنا صغيرة أصلا كنت بحب اقرء كتير وكنت بكتب كلام على قدي ومكنتش بنشر أو كدَ، في واحدة صحبتي حكتلها ولقتها في يوم من الايام بعتتلي لينكات ادخل فيها عشان أنمي موهبة الكتابة وفعلا بدأت اتعلم وأكتشفت نفسي بعد كده 

نوع الكتابة: نثر

مين دعمكِ؟ اهلي أولًا ومش صحابي كلهم حقيقي

إنجازاتك:عملت ٤ كُتب، ٣ على أرض الواقع وواحد إلكتروني، وأتكتب عني في النماذج المشرفة و المواهب المدفونة وفريق 'نجح في مصر'

جزء من كتاباتك:يقول لي : لِمَ تعودي و تدخُلين في عِلاقات تُسبب لَكِ أذىٰ نفسي؟

=لأن مِن المُمكِن أن كُل ما حدث هذا تدبير من الله لِكي أتقابل بِكَ وتكون أنت حُسن الحظ والعوض عن كُل ذلك الأذىٰ.

يقول لي أيضًا: لَكِن هذا حقوقك عِندي أن أقدم لكِ كُل ما بوسعي كي أعوضك عن ما حدث لكِ.

= لا يُسمىٰ بأن هذه حقوقي بل يُسمىٰ أن قلبك أحب قلبي، وفي قانون الحُب، لا يُمكِن أن قلب يُؤذي قلب يُحبه والذي بينَّا ليس حُب فقط الذي بينَّا حُب مدينة بأكملها ليس شخصان فقط.

يقول لي: هل تدري بأني أُحبك كثيرًا وكأنكِ خُلقتِ لُتسكُني الجُزء الأيسر مني.

= يا من سكنت الفؤاد أعلم بِحُبك لي، وأنا أيضًا أُحبك وكأنك خُلِقت لتكون السند دائمًا لي.

لـِ مـنـة يـاســر'رنــوة'

الكتب الي اشتركتي فيها: كتاب تلاقي أحرف، كتاب بداية كُتّاب، نفوس تناثرت حِبرًا، وكتاب الكتروني 'نزيف أقلام'.

اشتغلتي ليدر او مؤسسة قبل كده و في كيان ايه؟ اشتغلت ليدر في كيان وجدان 

الكيانات الي كنتي فيها:قلمي يتحدث، طفرة، ومرساة، وجدان، كوكب رحيل، سأصبح كاتبًا، القمر المنير.

نفسك توصلي لأي في مجالك:نفسي يكون عندي حصيلة لغوية أكتر من كدَ ويكون عندي متابعين يحبوا يقرأوا ليا، نفسي أعمل كيان ويكون كيان كويس في الوسط وادعولي

تعرضتِ لحاجة احبطتك قبل كدَ في مجالك: أكيد طبعًا مكنش بسلم من كدَ وكنت بفقد شغف بس كل مرة كنت بتستلم فيها برجع بعدها احسن من الاول 

رسالة تحبي تقوليها لغيرك:اول حاجة لو حاسس جواك شيء ممكن يجعل منك شخص كويس متترددش أنك تشتغل على الشيء اللي جواك وتخليه كبير.

ايه اول اعمالك وهل فخوره بيها وبطريقتها ولا لا سواء كان سرد أو حوار او حبكه:كان سرد بصي مش هقولك مش فخورة بيها لا أنا فخورة جدًا لأن دَ كان بداية للنجاح اللي أنا فيه دلوقتي.

استفادتي ايه من تجربتك:استفدت اني مسبش حد يأثر عليا بكلام سلبي، وأني لازم ادور على نجاحي وأخطط ليه لأن مفيش حاجة هتيجي بسهولة طبعًا، واتعلمت الصبر ، واستفدت طبعا أني نمِت الحصيلة اللغوية.

اكتر عيوب فيك ك كاتب ونفسك تغيرها: أني ابطل أتسرع مثلا ف أني انشر ليا نص بعد ما اكتبه على طول لأن ساعات بيبقا فيه اخطاء مبخدش بالي منها وانا اللي باخد منها بعد كده يعني ياريت كمان حد يقولي لا أنا اللي بكتشف العيب ده

السؤال الأخير ايه تقييمك لنفسك: طبعًا أنا تقيمي لنفسي مش ثابت لأني حقيقي من غير غرور بتقدم يعني اول ما بدأت مش زي دلوقتي كل شوية بيكون في تقدم

حوار صحفي مع مريم أحمد

 الاسم: مريم أحمد أنور، والشهرة بمريم أنور، واللقب بميروميا.

السن: 14 عام.

المحافظة: القاهرة.

الموهبة: الكتابة، بالإضافة للتصوير والديزاين والإنشاد.

بدأتِ امتى؟ 9/6/2020.

اكتشفتِها ازي؟ بالصُدفة.

نوع الكتابة: خواطر، نصوص، قصص.

مين دعمكِ؟ الله ثُم بعض الأصدقاء.

إنجازاتك: شاركت في كُتب إلكترونية، وكتاب مُجمع ورقي 2022.

جزء من كتاباتك: 

"جحيمُ العُزلةِ"

بين الحين والآخر تُوقد نِيران العُزلة بداخلي، لا أعلم حقًّا ماذا حَدث، فقد تحولتْ شخصيتِي المرحةُ الاجتماعيةُ لشخصيةٍ كئيبةٍ انطوائيةٍ، صارت العُزلة مَلجأي الوحيد في الحياةِ، لم أعد أريد صديقًا أو حبيبًا بجواري، فقط أُريد فنجان قهوتِي الذي يُغيثني من ضجيجِ العالمِ، وأن أجلس وحيدًا في غُرفتي مُنعزلًا عنْ بني البشر، فقد آذاني هذا وخذلني ذاك، تشهدُ عليَّ جُدران غُرفتي كم صرختُ وكم تألمتُ، تشهدُ عليا وسادتي كم أغرقتُها من البُكاءِ، ثمَّة أشياءٍ كثيرةٍ لا تُحكى، كُل ليلةٍ يحلُّ الليل بظُلماتهِ على قلبي، أُواجه عقبات الحياة بِمُفردي، أجتازُ عوائق الحياة وحيدًا، لا أجدُ أحدًا يُطمئن زمهرير قلبي، أميلُ فلا أجد كتفًا أستندُ عليه، تكادُ العُزلة بجحيمِها أن تحرقَ قلبِي، أختنقُ داخليًّا ولا أحد يعلم، أشعر أنَّ هُناك حِممًا بُركانيةً تنبثقُ من رُوحي، لا أدري ماذا أفعلُ فما باليدِ حيلةً،  فلتفعل العُزلة بجحيمِها بي ما يشاءان مِن حُرقةٍ وحرائِق.

_مريم أنور.

الكتب الي اشتركتي فيها: حُرية قلم 2022(بيتم العمل عليه حاليًا)، ضنين المشاعر الإلكتروني، وكلمات من الياقوت، وصراع الأرواح إلكتروني (يتم العمل عليهم أيضًا).

اشتغلتي ليدر او مؤسسة قبل كده و في كيان ايه؟ أنا حاليًا ليدر ومُصححة في كيان غيث، ومُصححة في كيان طفرة.

الكيانات الي كنتي فيها: كتير، مش مُتذكرة حاليًا.

نفسك توصلي لأي في مجالك: إلى الآن شايفة نفسي عند بداية السلم، ونفسي أبقى الكاتبة المُفضلة للجميع، وأعمل كتاب ورقي ليا، بلص إني حاليًا بجهز لرواية إلكترونية خاصة بي.

تعرضتِ لحاجة احبطتك قبل كدَ في مجالك: كُلنا بلا استثناء بنتعرض لاحباط وتشجيع، وفي كلا الحالتين لازم نكمل ونبقى أقوى.

رسالة تحبي تقوليها لغيرك: لو قُدامك هدف أو حلم اسعى عليه، استعن بالله ولا تعجز.

ايه اول اعمالك وهل فخوره بيها وبطريقتها ولا لا سواء كان سرد أو حوار او حبكه: فخورة بيا بِكُل شيء عملته، رغمَ إني كُنت بعك في البداية بس كُنت بسند نفسي بنفسي مش بحد.

استفادتي ايه من تجربتك: اتثقفت أكتر ونميت مواهبي.

اكتر عيوب فيك ك كاتب ونفسك تغيرها: يمكن إن كُل كتابتي حزينة.

السؤال الأخير ايه تقييمك لنفسك: زي ما قولت فوق لسه في بداية السلم وبداية الحلم، بس فخورة بيا بكل خطوة باخدها.

حوار صحفي مع هدية محمد

 الاسم: هديه محمد سالم

السن: 17 سنه

المحافظة: كفر الشيخ

الموهبة: روائيه

بدأتِ امتى؟ من 3 شهور

اكتشفتِها ازي؟ بقراء روايات كتير فحبيت اجرب والحمد لله كثيرا نجحت 

نوع الكتابة: لغه عربيه فصحي 

مين دعمكِ؟ مريم ميلاد صديقه مسيحيه 

إنجازاتك: رواية عندما يعشق الفهد علي مواقع كتير لجوجل "كامله" 

جزء من كتاباتك: " فتاه جميله من عائله فقيره عفوا هل قلت عائله فهي تعيش هيا ووالدتها بمفردهما "

الكتب الي اشتركتي فيها: لسه مشتركتش 

اشتغلتي ليدر او مؤسسة قبل كده و في كيان ايه؟ 

 ايوا كنت ليدر في كيان نبض الكتب بس خرجت علشان دراستي واهملت الكيان 

الكيانات الي كنتي فيها: كيان مراسيل وانفصام وحلم بسيط وكيان ظل الكتاب 

نفسك توصلي لأي في مجالك: اولا كدا التوفيق من الله وبعدين اكون كاتبه روائيه عالميه وان شاء الله هوصل 

تعرضتِ لحاجة احبطتك قبل كدَ في مجالك: ايوا من بنات صحابي كانو بيقولو كتابة اي وبعض كلمات السخريه 

رسالة تحبي تقوليها لغيرك: اولا ثق في الله انو مش هيخزلك واتبع حلمك متخليش كلام حد سلبي ياثر عليك 

ايه اول اعمالك وهل فخوره بيها وبطريقتها ولا لا سواء كان سرد أو حوار او حبكه: عندما يعشق الفهد ودي كانت تحربتي في الكتابه والحمد لله نجحت ومبسوطه بيها جدااا

استفادتي ايه من تجربتك: الصبر والبعد عن اي تاثير سلبي وان ربنا عمرو ما نساني مادامت واثقه فيه انو عمرو ما هيضيع ثقتي فيه 

اكتر عيوب فيك ك كاتب ونفسك تغيرها: اولا انا عيبي التاخير في الكتابه والكسل مع ان الافكار موجوده والحمد لله بس بكسل وان شاء الله هغيرها 

السؤال الأخير ايه تقييمك لنفسك: والله انا بقيم نفسي 89 ٪ مش اكتر ولا اقل لكن قريبا 100٪ باذن الله

حوار صحفي مع شوق خالد

 الاسم: شوق خالد "ابنه حواء "

السن: 17 

المحافظة: القاهرة 

الموهبة: الكتابة و الإلقاء الشعر 

بدأتِ امتى؟ بدأت لما كان عمري 11 سنه و بعدها وقفت كتابه خالص لمده خمس سنين و رجعت تاني من سنه 

اكتشفتِها ازي؟ اكتشفتها من لما كنت بسمع قصايد كتير بشكل مستمر و أبدأ أكتب عنها ده بالنسبه للشعر أما الروايات فمن سنه و انا بحب دايما اقراهم و كتبت و نحجت فيها الحمد لله. 

نوع الكتابة: خواطر نصوص شعر روايات اسكريبتات مقالات 

مين دعمكِ؟ مجربتش دعم من حد علشان مكنش عندي حد يعرف اني بكتب غير بعد أما بدأت اكتب و انشر وقتها بدأ كله يشكر في كتاباتي .

إنجازاتك: روايه طفله قاسم و كتاب مجمع نزل معرض القاهره اللي فات و كيان أحفاد حواء ده جزء بس من انجزاتي .

جزء من كتاباتك: ديه قصيدة من كتاباتي 

 ( *قالك أيه المرادي*   

ها قالك أيه المرادي 

قالك تعبان و مش راضي 

ولا تاه في الأرض و مش لاقيله أراضي

قالك في بعدك دمعت 

و لا ضحكت عليكي و خدعت 

قالك كنت بلعب بيكي و لما تعبتك ودعت 

قالك تعبان من يوم بعدك 

ولا الوقت زاد بعدك 

قالك مبنام الليل و سهران ليلاتي 

و لا قالك لقيت إللى غيرت حياتي 

حكاية خسرانة من الأول 

قال تعبان و هطول شكلك شارية كلب خسيس 

و هو باع حبك بشكل رخيص 

و قالك أحنا صحاب سيبك من الشكليات 

الحب اللي بينا مات 

قالك هنام و آنا أنك وجعاكي الأيام ولا يترى ضحك عليكي بالكلام .

 *. شوق خالد .* 

 *. ابنه حواء .*    )

الكتب الي اشتركتي فيها: كتاب مبهج بطعم الحزن ورقي و كتاب هوس إلكتروني و كذا كتاب كمان بس مش مفتكره الاسامي .

اشتغلتي ليدر او مؤسسة قبل كده و في كيان ايه؟  اشتغلت ليدر مسابقات في كذا كيان و اشتغلت ليدر تنظيم مره و عندي كيان بتاعي اسمه أحفاد حواء. 

الكيانات الي كنتي فيها:

زادك ، كلمه ونص ، روح ، حياه ، ضجر ، نورجول ، حلم بسيط ، عمق ، و إلخ

نفسك توصلي لأي في مجالك: نفسي أول أما يتقال أسمي في اي مكان ليه علاقه بالكتابة يكون كله يعرف "ابنه حواء" و بيشكر في موهبتها. 

تعرضتِ لحاجة احبطتك قبل كدَ في مجالك: اكيد بس مش بتأثر بيها علشان عندي ثقه كافيه في اللي بقدمه .

رسالة تحبي تقوليها لغيرك: حدد أهدافك و أختار احلامك و حب نفسك و ثق في نفسك و في ربنا و أجري ورا حلمك و انت هتحققه و خليك اكبر دعم لنفسك علشان انت تستحق تكون ناجح .

ايه اول اعمالك وهل فخوره بيها وبطريقتها ولا لا سواء كان سرد أو حوار او حبكه: أول أعمالي روايتي اسمها ( طفله قاسم ) موجوده على الواتباد و فخوره بيها الحمد لله و بعدد مشاهداتها .

استفادتي ايه من تجربتك: استفدت اني انا الوحيده اللي هقدر أحقق أحلامي و انا اللي هكمل و اني دايما اعتمد على نفسي و على ربنا و بس .

اكتر عيوب فيك ك كاتب ونفسك تغيرها: مش عارفه بصراحه بس دايما بحس اني لازم اجدد في كتاباتي و اطور منها .

السؤال الأخير ايه تقييمك لنفسك: مظنش تقييمي لنفسي هيفرق لحد غيري لكن تقييم اللي بيتبعوني اكيد هو اللي هيفرق .

حوار صحفي مع مريم محمود

 الاسم: مريم محمود عمر

السن: ١٩

المحافظة:  المنيا

الموهبة: الكتابة

بدأتِ امتى؟ ٢٠/١/٢٠٢٠

اكتشفتِها ازي؟ كان في بوست إعلان عن مسابقة كتابة كانت عن جملة معينة فقولت أجرب لقيت نفسي واخده مركز ومن هنا عرفت إني بعرف أكتب، وبدأت أنمي موهبتي.

نوع الكتابة: روايات وخواطر وقصص قصيرة ومقالات ونصوص واسكريبتات

مين دعمكِ؟ أنا كنت بدعم نفسي، لأن الجميع كانوا شايفين الي بعمله حاجة تافهه وهيأثر على دراستي، وده كان بيعملي مشاكل نفسية والحمد لله كنت الأقوى.

إنجازاتك:  شاركت في كتب ورقية وأيضا إلكترونية، حاليا بحضر لعمل ورقي(رواية) وان شاء الله تنزل معرض الكتاب ٢٠٢٣

جزء من كتاباتك: «غيمةٌ سوداء»

وليلٍ أتىٰ بأوجاعٍ قاسية، جعلت من الروحِ شتاتٌ يصعبُ جمعها، وسالت دموعُ الألآم متتالية، وكأنها فيضٌ أغرق المدينة بأسرها، وصراعُ عزّ عليَّ جهرهِ، فبات مكتومًا بداخلي، وآلاف من الآهاتِ الممزوجة بحسرة، علىٰ ما ضاع من العمرِ في سهوةٍ، فمرت الريحُ بما لا تشتهي النفس، وغدت الآلامُ تذكارًا واضحًا، وخطأ القائلون بقولهم: ليتَ الشباب يعود يومًا، وماذا عن شبابٍ يُقضىٰ في تجرعٍ من الخيباتِ والأوجاع تسلسلًا، يا ليتَ كلَ مُرٍ ينقضي، وكأن لم نذق غيرَ السعادةِ سرمدًا، فزادَ الألم وأصبح البُكىٰ خريرًا.

-مريم محمود 

الكتب الي اشتركتي فيها: دليل الفجر، كتاب الليل، كتاب إغتيال فكر، وغيرها من الكتب الورقية تبع كيان نصوص عظيمة، وظل الكتاب

اشتغلتي ليدر او مؤسسة قبل كده و في كيان ايه؟ ليدر في كيان تبلج قلم، ومصححة ومدققة لغوية في كيان غيث

الكيانات الي كنتي فيها: حلم بسيط، نصوص عظيمة، تبلج قلم، كتيب وقلم، فانتازيا

نفسك توصلي لأي في مجالك: توصل كتاباتي للجميع، وتصبح مفضلة لأحدهم وحينها أستحق لفظ كاتبة. 

تعرضتِ لحاجة احبطتك قبل كدَ في مجالك: في البداية كانت في إنتقادات ودي حاجة طبيعية، بس الحمد لله تخطيت كل ده بنفسي

رسالة تحبي تقوليها لغيرك: تمسك بالحلم وإن بات مستحيلًا، كن خير داعم لنفسك ولا تنتظر المساعدة من أحد، أكمل طريقك ولا تبالي بعثراته.

ايه اول اعمالك وهل فخوره بيها وبطريقتها ولا لا سواء كان سرد أو حوار او حبكه: رواية إمرأة بقلب رجل، كانت أول رواية أكتبها وفخورة جدا بيها، كتاباتي كلها فصحى سواء سرد أو حوار

استفادتي ايه من تجربتك: إن طالما في إرادة يبقى مفيش حاجة مستحيلة، إستفدت كمان إن معظم الناس هيعرفوك لما تبقى ناجح

اكتر عيوب فيك ك كاتب ونفسك تغيرها: كان عيبي إني بتأثر ب إنتقادات الآخرين بس دلوقت الحمد لله تجاوزت العيب ده

السؤال الأخير ايه تقييمك لنفسك:

فخورة بالي وصلتله، والي لسه هوصله، واثقة جدا إني هبقى كاتبة عظيمة في المستقبل لأن دي أمنيتي وواثقة أن ربنا مش هيخذلني.

حوار صحفي مع آلاء صفوت

 الاسم:آلاء صفوت القط. 

السن: 14 سنة. 

المحافظة:محافظة سوهاج. 

الموهبة: الكتابة. 

بدأتِ امتى؟ اكتشفت موهبتي من بتاع سنة ، بس بدات انشر من 4 شهور. 

اكتشفتِها ازي؟ كنت بنجذب جدا للكتابة. 

نوع الكتابة:خواطر وروايات واسكريبتات. 

مين دعمكِ؟ صحابي ومامتي. 

إنجازاتك: هيا ممكن تبان مش انجاز اوي بس هيا بالنسبالي حاجه كبيرة (اخدت شهايد كتير من اكتر من كيان ، وألفت رواية ونالت اعجاب كل الي قراؤها الحمدلله ، وكتبت اسكريبتين). 

جزء من كتاباتك:

-قولت اي؟!

=انا بحبها بس مش عارف هقدر احميها ولا لا.

-انا واثق انك تقدر.

=وانا مش واثق في الدنيا ، الدنيا ادتني ضهرها كتير وظلمتني اكتر ، مش عايزها تتظلم معايا.

-هتبقى مبسوط لما حد غيرك ياخدها.

=دانا امحيه من على وش الارض.

-مش هتقدر تعمل حاجه.

=لا هقدر.

-بصفتك اي دانتا حتى مش قادر تعترفلها انك بتحبها.

=هعترفلها ، وحالا.

(مُقتبس من اسكريبت هينزل قريب.) 

الكتب الي اشتركتي فيها:حتى الان مشتركتش في كُتب. 

اشتغلتي ليدر او مؤسسة قبل كده و في كيان ايه؟ اه كنت ليدر في كيان "نجم" ، ومانجر في كيان "بحر الحياة". 

الكيانات الي كنتي فيها: كيان "نجم" ، كيان "ما وراء قلمك" ، كيان "عائلة بنت الازهر". 

نفسك توصلي لأي في مجالك: اتمنى ان يكون في حد بيحب كتاباتي واكون معروفة شويا في الوسط. 

تعرضتِ لحاجة احبطتك قبل كدَ في مجالك: اه. 

رسالة تحبي تقوليها لغيرك: متستناش حد يمسك ايدك وياخدك للحاجه الي انت عايزها ، قوم واشتغل على نفسك وحقق حلمك بنفسك ، علشان لما تنجح محدش يبقى لي فضل عليك. 

ايه اول اعمالك وهل فخوره بيها وبطريقتها ولا لا سواء كان سرد أو حوار او حبكه: اول اعمالي هوا روايتي ، واه فخورة بيها جدا. 

استفادتي ايه من تجربتك: كسبت خبرات اكتر من ناس اقدم مني في المجال ، لقيت مكان صح اقضي فيه وقتي ، عرفت ان عالم الخيال دا حلو اوي ومش اي حد يقدر يبدع فيه.

اكتر عيوب فيكِ ك كاتبة ونفسك تغيرها: اني بتكاسل جدا. 

السؤال الأخير ايه تقييمك لنفسك: فخورة بنفسي جدا ، لان رغم صغر سني حققت انجازات ناس اكبر مني محققتهاش ، وان شاء الله احقق اكتر في المستقبل.

حوار صحفي مع ياسمين عماد

 الاسم: ياسمين عماد سيدأحمد حمادة

السن: ١٨ سنه

المحافظة: الشرقيه

الموهبة: الرسم

بدأتِ امتى؟ من 3 اعدادي 

اكتشفتِها ازي؟ كان ف واحده صحبتي بعتالي رسومات ليها فحبيتهم جداً وحبيت اقلدهم وقلدتهم طلعوا معايا حلوين اوي فبدأت ارسم واتفرج ع اليوتيوب و ارسم وبابا وقف معايا وساعدني وحب الفكره جداً وانا كمان حبيته اكتر وبدأت اشتغل ع نفسي ف الرسم وبدأت انزل ع الفيس وف الجروبات تبع المدرسه لعند لما اتشهرت والناس عرفت اني برسم

نوع الرسم: رسم بورتريه بالرصاص ورسم تعبيري وطبيعه صامته ولسه مبتدأه ف الرسم بالالوان المائيه

مين دعمكِ؟ بابا كل الشكر ليه طبعاً وناس اعرفهم وناس معرفهاش و جدي والمدرسين ف المدرسه وشويه من صحابي

إنجازاتك: اشتركت ف مسابقه واحده تبع الدراسه والحمدالله يعني

جزء من رسوماتك: رسمت مدير الإداره التعليميه و رسمت جدي 

الرسم الي اشتركتي فيها:  رسم طه حسين

اشتغلتي ليدر او مؤسسة قبل كده و في كيان ايه؟ لا مش اشتغلت مع ان اتعرضت عليا بس محبيتش اشتغل

الكيانات الي كنتي فيها: مفيش

نفسك توصلي لأي في مجالك: نفسي اوصل للاكبر مرحله ف الرسم نفسي اشتغل بكل انواع الالوان وابقى زي الفنان فان جوخ كده ف نفسي وابقى مشهوره جداً ويبقا عندي مرسم ومعرض لوح

تعرضتِ لحاجة احبطتك قبل كدَ في مجالك: اه اتعرضت كتير اوي بالكلام السلبي ومن اقرب الناس ليا بس انا مكنتش بهتم بكلامهم لان دي حاجه انا حابه وعاوزه اكمل فيه 

رسالة تحبي تقوليها لغيرك: اوعى تسيب حلمك حتى لو الطريق تحقق حلمك اتقفل ف وشك ابدأ افتحه من تاني وكمل الحلم وحققه اوعى الكلام السلبي يأثر عليك مهما حصل انت قد حلمك

ايه اول اعمالك وهل فخوره بيها وبطريقتها ولا لا سواء كان سرد أو حوار او حبكه:  كان اول رسمه كان رسمة بورتريه مدير الاداره و اه طبعاً فخوره بيه جداً

استفادتي ايه من تجربتك:  استفدت حاجات كتير عرفت ان الرسم بيعبر عن ال جوانه وعن الحقيقه واحنا مخبيينه

اكتر عيوب فيك ك رسام ونفسك تغيرها: ان ابدأ ف الرسمه واخلصه مش اسيبه وابدأ ف رسمه تانيه😁

السؤال الأخير ايه تقييمك لنفسك: فخوره جداً بنفسي اني وصلت للمرحله دي وان بحقق حلمي ال انا فضلت احلم بيه السنين ال فاتت ولسه بحلم بيه رغم كل الضغوطات ال عليا والدراسه والحمدالله اني بحب حلمي وعاوزه احققه وان شاء الله الحلم هيبقى حقيقه🎨♥️👩🏻‍🎨.

حوار صحفي مع نور احمد

 الاسم: نور أحمد مصطفي

السن: 18 سنه 

المحافظة: الشرقية

الموهبة: الكتابة والتصحيح

بدأتِ امتى؟ من حوالي4 شهور 

اكتشفتِها ازي؟ أنا بكتب في نوت من وأنا سني 11سنه 

نوع الكتابة: كتابه خواطر ونصوص وروايات ونوفيلا 

مين دعمكِ؟ أهلي وصحابي وعيلتي

إنجازاتك: مشتركه في كتاب  ورقي اسمه"حلم بسيط"

جزء من كتاباتك: 

*هرتلات المساء*

أحيانًا تطلب من نفسك بأن تغط في النوم دون سابق إنذار، ولكن عقلك يكن له رأي آخر يعيد لكَ كل ما يحدث معك منذ بداية الليلة حتى انتهائها، تزداد بها أفكارك وتعلن راية الاستسلام لتلك الأفكار، أحيانًا يذكرك بمواقفك، وأحيانًا كلمات تتركز بعقلك، ولكن تعطي أنتَ لنفسك مساحة للتخيل، تعيش جوًا من التخيلات التي تعتبر جزء مجزأ من حياتك العملية وأحيانًا العاطفية، فتفكر في مستقبلك وهل هو ملون أم حالك السواد؟ وأحيانًا تفكر في من يشغل عقلك دائمًا، هل شعرتم بهذا الشعور يومًا؟!

----------

*لـِ نـور أحمد "نوتــــيلا"*

الكتب الي اشتركتي فيها: كتاب حلم بسيط بس حاليًا لسه مشتركتش في حاجه تاني وان شاء الله هشترك.

اشتغلتي ليدر او مؤسسة قبل كده و في كيان ايه؟ نائب مؤسس كيان أقلام النبلاء ومؤسسه لكيان ضوء

الكيانات الي كنتي فيها: عائلة حياة وكيان بريق وكيان أقلام هائمة وكيان ظلام وعائلة ألماس

نفسك توصلي لأي في مجالك: الخبرة نفسي يكون ليا خبره أكبر في مجالي وأحقق حلمي أني أكون كاتبه مشهوره

تعرضتِ لحاجة احبطتك قبل كدَ في مجالك: قابلت كتير بس بقف ومش بستسلم

رسالة تحبي تقوليها لغيرك: كل ما تقع قوم تاني حتى لو عديت بفشل كتير بس في الأخر هتوصل

ايه اول اعمالك وهل فخوره بيها وبطريقتها ولا لا سواء كان سرد أو حوار أو حبكه: نوفيلا "حب أم عشق أم جنون" ومبسوطه بيها جدًا لأنها عملت ضجه في السوشيال

استفادتي ايه من تجربتك: أن مش فيه حاجه اسمها مستحيل 

اكتر عيوب فيك ك كاتب ونفسك تغيرها: بضغط نفسي في شغل كتير فبحاول أني أنظم كل حاجه.

السؤال الأخير ايه تقييمك لنفسك: ممتاز لأني شايفه اني بشتغل جامد عشان أطلع أحلا شغل